काठमाडौं- नेपाल कम्युनिस्ट पार्टी (नेकपा) का उपाध्यक्ष वामदेव गौतमले नेकपा विभाजित भएर आगामी निर्वाचनमा गए कम्युनिस्ट पार्टी पराजित हुने बताएका छन् । उनले विभाजित अवस्थामा ओली र प्रचण्ड दुवैले नेतृत्व गरेको पार्टी पराजित हुने दाबी गरेका हुन् ।
बुधबार राष्ट्रिय एकता अभियानको घोषणा गर्दै गौतमले भने, ‘कम्युनिस्ट पार्टीका मतदाता बाँडिए नेपाली कांग्रेसले बहुमत ल्याउने पक्का छ, हामीले केही ठाउँमा जितौँला ।’
उनले प्रधानमन्त्री समेत रहेका एक अध्यक्ष केपी शर्मा ओलीले दुई तिहाई बहुमत ल्याउने बताइरहे पनि त्यो सम्भव नरहेको बताए । ‘विभाजित अवस्थामा निर्वाचनमा गए हामी पराजित हुने भन्दा अर्को विकल्प छैन’, गौतमले भने, ‘कम्युनिस्ट पार्टी फुटेपछिको दुःख हामी सबैले बुझेका छौँ ।’
गौतमले १३ वर्ष लगाएर एकीकृत गरेको पार्टी तीन वर्ष नहुँदै विभाजित अवस्थामा पुग्नु दुःखदायी रहेको बताए । पछिल्लो समय गौतम फाटो आएको पार्टीलाई एक गराउने अभियानमा जुटेका छन् ।
