काठमाडौं- प्रधानमन्त्री केपी शर्मा ओलीले जनतालाई प्रणाम गरेर प्रचण्डलाई चितवनबाट आफूहरूले जिताएको बताएका छन् ।
जिफन्टले बिहीबार काठमाडौंमा आयोजना गरेको कार्यक्रममा बोल्दै ओलीले भने, ‘७४ सालमा प्रचण्डलाई जनतालाई प्रणाम गरेर चितवनमा हामीले जिताएको । ७० मा बत्ती निभाएर बाकस साटेर जितेका हुन् । त्यो भन्दा अगाडि कीर्तिपुर हारिसक्नु भएको थियो ।’
प्रचण्ड अब चुनाव लड्न जाने कुनै ठाउँ नभएको पनि ओलीले बताए । ओलीले भने, ‘उहाँ त यस्तो ‘फ्लोटिङ’ हुनुहुन्छ नी कहिले रोल्पा, कहिले सिराहा, कहिले कीर्तिपुर जानुभयो अब जाने ठाउँ कतैपनि छैन ।’
जनयुद्धको बेला प्रचण्ड जेलवाला तेल लाएर जुल्फी कोरेर दिल्ली बसेको उनको टिप्पणी छ ।
ओलीले भने, ‘जंगलमा न हिजो बस्नु भएको थियो न अब बस्नु हुन्छ । हिजो जंगल बस्नु भएको हैन उहाँ । दिल्ली, लखनऊमा हुनुहुन्थ्यो हामीलाई थाहा छ । जंगलमा उहाँले कार्यकर्ता र लडाकु बसाउनु भयो । आफूहरू त जेलवाला तेलले जुल्फी कोरेर दिल्ली बस्नुभयो ।’
