काठमाडौं- नुवाकोटमा नेकपा ओली समूह र प्रचण्ड-माधव समूहबीच झडप भएको छ ।
प्रचण्ड-माधव समूहका कार्यकर्ताहरूले बट्टार क्याम्पस अगाडि कालोझण्डा देखाएर उपप्रधानमन्त्री ईश्वर पोखरेल चढेको गाडीमा ढुंगामुडा गरेपछि दवै पक्षबीच झडप भएको हो ।
झडपमा प्रचण्ड-नेपाल समूहका तीनजना कार्यकर्ता सामान्य घाइते भएका छन् । ओली समूहले आयोजना गरेको कार्यक्रमलाई सम्बोधन गर्न उपप्रधानमन्त्री पोखरेल र उर्जामन्त्री टोपबहादुर रायमाझी नुवाकोट पुगेका छन् ।
केहीबेर अघि आन्दोलनकारीले सडकमा टायर बालेर केपी ओली मुर्दावादका लगायतका नारा लगाएका थिए । ढुंगामुढापछि पोखरेलको गाडीमा सामान्य क्षति पुगेको छ ।
उद्योग वाणिज्य तथा आपूर्तिमन्त्री लेखराज भट्टको स्वकीय सचिव मीनबहादुर सिंह चढेर आएको नेपाल आयल निगमको गाडीको पछाडिको भागमा भने पूर्ण क्षति पुगेको छ । घटनाबारे थप अनुसन्धान भइरहेको प्रहरीले जानकारी दिएको छ ।
