काठमाडौं- प्रधानमन्त्री केपी शर्मा ओलीले प्रचण्ड-नेपाल समूहले गरेको आम हड्तालप्रति व्यंग्य गरेका छन् ।
राजधानीमा बिहीबार अखिल नेपाल किसान महासंघको भेलालाई सम्बोधन गर्दै प्रधानमन्त्री ओलीले गरिब किसानको तरकारी फ्याँकेर आन्दोलन सफल भएको ठान्नेहरूप्रति व्यंग्य गरेका हुन् ।
भेलालाई सम्बोधन गर्दै प्रधानमन्त्री ओलीले भने, ‘गरिबको तरकारी फ्याँकेर महान्.. आन्दोलन उहाँहरूले सफल पार्दै हुनुहुन्छ । कति दुःख कष्ट गरेर फलाएको तरकारी, बाटाका छेउमा ल्याएर बेचीराखेको तरकारी एउटी आमाले बोकेर ल्याएको टमाटर सडकभरी फ्याँकेर क्रान्तिकारीता देखाउनु भयो प्रचण्डले । माधव नेपालले ।’
‘अरूका गाडी जलाउनु भयो । आफू गाडीमा सयर भएर जनताले कति दुःख पाएका छन् हँ तमासा हेर्दै हिंड्नुभयो । अर्को (माधव नेपाल) बाइक लिएर हिंड्दै जनताले कति दुःख पाएका छन् भन्दै रमिता हेर्दै हिंड्नुभयो’ प्रधानमन्त्री ओलीले थप भने ।
