काठमाडौं- नेकपा ओली समूहले आज काठमाडौंमा शक्ति प्रदर्शन गर्दैछ ।
शुक्रबार दिउँसो नारायणहिटी संग्रहालयअगाडि हुने शक्ति प्रदर्शन (जनसभा) मा प्रधानमन्त्री केपी शर्मा ओलीले सम्बोधन गर्ने छन् । प्रधानमन्त्रीले आजको सम्बोधनमार्फत विशेष नयाँ कुरा बताउने दाबी उनीपक्षीय नेताहरुले गर्दै आएका छन् ।
पत्रकारसम्मेलन गरेरै ओलीले अहिलेसम्म नबोलेको कुरा आजको सभामा बोल्ने दाबी ओली समूहका नेताहरुले गरेपछि नेकपा प्रचण्ड–नेपाल समूहका नेता सुरेन्द्र पाण्डेले ‘ओलीले हिन्दु राष्ट्र बनाउने घोषणा गर्न सक्छन्’ भनी भाषण गरेका थिए ।
प्रतिनिधिसभा विघटन भएपछि नेकपाको (प्रचण्ड–नेपाल) समूहले चरणवद्ध आन्दोलन गरिरहेको छ। त्यसक्रममा काठमाडौंमा बृहतसभा गरिएको थियो।
त्यसपछि प्रधानमन्त्री ओली नेतृत्वको नेकपाले पनि काठमाडौंमै जनसभा गर्न लागेको हो । ओली समूहका नेताहरुले प्रचण्ड–नेपाल समूको जनसभालाई कटाक्ष गर्दै वास्तविक जनसभा माघ २३ (आज) मा देखाउने बताएका थिए ।
आजको सभाका लागि विभिन्न जिल्लाबाट हजारौं मानिसहरुलाई काठमाडौं उतार्ने तयारी ओली समूहको छ। तराईंका हरेक जिल्लाबाट कम्तीमा १० हजार मानिस काठमाडौँ ल्याउने तयारी भइरहेको छ ।
