काठमाडौं- मुलुकको विकसित राजनीतिक घटनाक्रम देखेर कलाकारहरूले पनि चिन्ता व्यक्त गर्न थालेका छन् । यसबारे उनीहरूले सामाजिक सञ्जाल तथा अन्तर्वार्ताबाट अभिव्यक्ति दिइरहेका छन् ।
सोहीक्रममा अभिनेत्री वर्षा सिवाकोटीले पनि चिन्ता व्यक्त गर्दै पद, पैसा र निजी स्वार्थले राजनीति दूषित भएको तर्क गरेकी छन् ।
अभिनेत्री सिवाकोटीले लेखेकी छन्, ‘देश र जनताको हितकालागि गरिने राजनीति पद, पैसा र निजी स्वार्थले दूषित भएको छ ।’ यस्ता व्यवहारले समृद्ध नेपालको अवधारणा सफल नहुने उनको भनाइ छ ।
साथै उनले सम्मानजनक राजनीति, जहाँ विपक्षीको विचारको आलोचना मात्र होइन विवेकपूर्ण विश्लेषण, विमर्श र राजनीतिक दलहरूबीच स्वस्थ प्रतिस्पर्धा हुनुपर्ने बताएकी छन् ।
‘जनताको मतको मान होस् । कामप्रति निष्ठा र इमानदारीता होस्’ उनले थप उल्लेख गरेकी छन् ।
उनले राजनीतिको यो रूप देखिरहन नपरोस् भन्दै कामना व्यक्त गरेकी छन् । साथै देशले चाँडै मुहार फेर्ने विश्वास उनकाे छ ।
