चितवन- चितवन क्रिकेट संघको आयोजनामा १७ औँ संस्करणका रूपमा ‘प्रेम मार्केट चितवन च्याम्पियनसिप–२०७७’ हुने भएको छ । प्रतियोगिता यही माघ २७ देखि फागुन १ गतेसम्म चल्नेछ ।
संघले आइतबार एक विज्ञप्ति जारी गर्दै एकदिवसीय विधा (५० ओभर) को प्रतियोगिता आयोजना गर्न लागिएको जानकारी दिएको हो । प्रतियोगितामा जिल्लाभरका छ वटा टिमको सहभागिता रहने प्रतियोगिताका संयोजक उमेश पियाले जानकारी दिए ।
उनका अनुसार चितवन क्रिकेट क्लब, भरतपुर क्रिकेट क्लब, मुनस्टोन क्रिकेट क्लब मङ्गलपुर, इस्र्टन क्रिकेट एकेडेमी टाँडी, बेलचोक क्रिकेट क्लब भरतपुर र गीतानगर क्रिकेट क्लब प्रतियोगितामा सहभागी हुनेछन् ।
छ टिमलाई दुई समूहमा विभाजन गरी लिग खेलाइने छ भने समूह विजेता टोलीले सिधै उपाधिका लागि भिड्ने आयोजकले जनाएको छ ।
‘प्रेम मार्केट चितवन च्याम्पियनसिप-२०७७’ प्रतियोगिता धुर्मुस-सुन्तली फाण्डेशनको अगुवाइमा रामपुरमा निर्माण भइरहेको गौतमबुद्ध अन्तर्राष्ट्रिय क्रिकेट रङ्गशालाको नमूना खेल मैदानमा हुनेछ ।
प्रतियोगिताको विजेताले रु २० हजार र उपविजेताले रु १० हजार पुरस्कार पाउने सङ्घका अध्यक्ष कैलाश प्रधानले जानकारी दिए ।
यस्तै म्यान अफ दि म्याच, म्यान अफ दि सिरिज, बेस्ट बलर र बेस्ट ब्याट्सम्यान पुरस्कार प्रदान गरिने उनले बताए ।
प्रतियोगितामा राष्ट्रियस्तरका खेलाडी आकाश थापा, गौतम केसी, हरिबहादुर चौहान, दीपेश श्रेष्ठ, अजित भण्डारी, सङ्घर्ष पौडेललगायतका खेलाडीले खेल्नेछन् ।
यस प्रतियोगिताले युवा खेलाडीको स्तरवृद्धिमा सहयोग पुर्याउने सङ्घले जनाएको छ । प्रतियोगिताको मुख्य प्रायोजक प्रेम सुपर मार्केट नारायणगढ रहेको छ ।
