काठमाडौं– काठमाडौंमा बेवारिसे शव जलाउँदै आएका विनयजंग बस्नेत पक्राउ परेका छन् । बीबीसीको प्रभावशाली १०० महिलाको सूचीमा परेकी सपना रोका मगरलाई ज्यान मार्ने धम्की दिएको आरोपमा बस्नेतलाई प्रहरीले मंगलबार पक्राउ गरेको हो ।
बस्नेतलाई काठमाडौंको नयाँ बसपार्कबाट पक्राउ गरिएको काठमाडौं महानगरीय प्रहरी परिसरका प्रमुख एसएसपी अशोक सिंहले जानकारी दिए ।
बस्नेतविरुद्ध सपनाले अभद्र व्यवहार गरेको तथा ज्यान मार्ने धम्की दिएको भन्दै आइतबार आइतबार काठमाडौं महानगरीय प्रहरी परिसरमा जाहेरी दिएकी थिइन् ।
म्याग्दी जिल्लाकी सपना सडक र गल्ली किनारमा भेटिएका बेवारिसे शवहरूको व्यवस्थापन गर्दै आएकी युवती हुन् ।
यसअघि बस्नेत र सपनाले एक–अर्कालाई बाब–छोरीका रुपमा चिनाउँदै आएका थिए । सपना विश्वकै १०० प्रभावशाली महिलाको सूचीमा परेपछि भने उनीहरुको सम्बन्ध बिग्रिएको थियो ।
बस्नेतले आफूसँग सपनाको अश्लील फोटो र भिडियो रहेको भन्दै सार्वजनिक गर्ने धम्की दिएका थिए । विभिन्न अन्तर्वार्तामा विनयले सपनालाई आफूले छोरी सरह व्यवहार गर्ने गरेको बताउने गरेका थिए ।
