काठमाडौं- पूर्वप्रधानमन्त्री तथा जनता समाजवादी पार्टी (जसपा) का संघीय परिषद् अध्यक्ष डा.बाबुराम भट्टराईले अदालतको फैसलाले अन्योल सिर्जना भएको बताएका छन् ।
आइतबार सर्वोच्च अदालतले ‘नेकपा’ नामको आधिकारिक पार्टी ऋषिराम कट्टेलको भएको फैसला गरेको थियो ।
अदालतको फैसलाले सत्तारुढ नेकपा (केपी ओली र प्रचण्ड-माधव पक्ष) लाई प्रभावित तु्ल्याएको छ । यी दुई पक्षले ‘नेकपा’ आधिकारिकताको दाबी गर्दै आएका थिए ।
सर्वोच्चले साविक नेकपा एमाले र माओवादी केन्द्र ब्युँताएको छ । अदालतको पछिल्लो फैसलाले सरकारको नेतृत्व गर्ने पार्टी कुन हो भन्ने प्रश्न उठाएको छ ।
सर्वोच्चको फैसलापछि संक्षिप्त प्रतिक्रिया दिदै सांसद समेत रहेका डा.भट्टराईले नेपाली राजनीतिमा थप अन्योलता सिर्जना भएको बताए ।
उनले भने, ‘सर्वोच्चको पछिल्लो फैसलाले थप अन्योल सिर्जना गरेको छ । संविधानअनुसार सरकारले बहुमत मागेको छ र अल्पमतको सरकार भइसकेपछि सरकार परिवर्तन गर्ने प्रक्रिया अगाडि बन्नुपर्ने हुन्छ ।’
जसपा सत्ताको खेलमा नरहेको प्रस्ट पार्दै डा.भट्टराईले जसपा सरकारको दाबी गर्नेभन्दा मुद्दा केन्द्रित पार्टी भएको बताए ।
उनले थप भने, ‘जसपा सत्ताको दाबी गर्ने पार्टी होइन । यो मुद्दा केन्द्रित पार्टी हो । नेपालमा संरचनात्मक समस्या छन्, शान्ति प्रक्रियाका बाँकी काम, संविधानको अपूर्णता, राज्यका अंगहरूका अपूर्णतालगायतमा पूर्णता दिने गरी हामी आफ्नो मुद्दा उठाउँछौं हामी अहिले सत्ताको खेलमा छैनौं ।’
