काठमाडौं– सर्वोच्च अदालतको फैसलाबाट ब्युँतिएको नेकपा एमालेको पहिलो केन्द्रीय कमिटी बैठकले वरिष्ठ नेता माधवकुमार नेपाल पक्षका नेताको जिम्मेवारी खोसेको छ ।
प्रधानमन्त्री तथा पार्टी अध्यक्ष केपी शर्मा ओलीले शुक्रबार आफू पक्षीय केन्द्रीय सदस्यहरूको बैठक राखेर नेता नेपाल पक्षका नेताहरूको जिम्मेवारी खोसेको हो ।
सोही बैठकले विवादपछि माओवादी केन्द्रमा नफर्किएका गृहमन्त्री रामबहादुर थापा बादलसहित २३ जनालाई केन्द्रीय सदस्यमा मनोनित गरेको छ ।
बैठकले एमालेको विदेश विभाग प्रमुखमा डा. राजन भट्टराईलाई नियुक्ति दिएको छ । उक्त विभाग प्रमुखमा यसअघि माधव नेपाल थिए ।
त्यस्तै, सुदूरपश्चिम प्रदेश इञ्चार्जमा भीम रावललाई हटाएर लेखराज भट्टलाई जिम्मेवारी दिइएको छ ।
कर्णाली प्रदेश इञ्चार्जमा युवराज ज्ञवाली हटाएर यमलाल कँडेललाई तोकिएको छ ।
बागमती प्रदेश इञ्चार्जमा नेपाल पक्षकी अष्टलक्ष्मी शाक्यलाई हटाएर ईश्वर पोखरेललाई जिम्मेवारी दिइएको छ । भने प्रदेश १ मा भीम आचार्यलाई हटाएर सुवास नेम्वाङलाई जिम्मेवारी दिएको छ।
बैठकले पार्टीको प्रवक्तामा प्रदीप ज्ञवालीलाई तोकेको छ।
