काठमाडौं- नेकपा एमालेले १० औं राष्ट्रिय महाधिवेशनका लागि आयोजक कमिटी गठन गरेको छ ।
प्रधानमन्त्री एवं पार्टी अध्यक्ष केपी शर्मा ओलीको अध्यक्षतामा शनिबार बालुवाटारमा बसेको केन्द्रीय समितिको १२ औं बैठकले विद्यमान दुई सय ६४ सदस्यीय केन्द्रीय समितिलाई महाधिवेशन आयोजक समितिमा रुपान्तरण गरेको हो ।
बैठकले वर्तमान अध्यक्ष ओली र महासचिव ईश्वर पोखरेल आयोजक समितिको क्रमशः अध्यक्ष तथा महासचिव रहने निर्णयसमेत गरेको छ ।
बैठकले १० औं राष्ट्रिय महाधिवेशन मंसिर २ गते देखि ६ गतेसम्म गर्ने निर्णय समेत गरेको छ । यसै गरी संगठन विभाग प्रमुख विष्णु पौडेल र नेता टोपबहादुर रायमाझीलाई जनवर्गीय संगठनको व्यवस्थापनको जिम्मेवारी पनि दिएको छ ।
बैठकले महाधिवेशन आयोजक कमिटिका बैठकहरुको माइन्युट गर्ने जिम्मेवारी विष्णु रिमाल र प्रदीप ज्ञवालीलाई दिएको छ ।
यसैगरी नेपाल कम्युनिस्ट पार्टीको स्थापना दिवस आगामी वैशाख (अप्रिल २२) का दिन नेकपा एमालेको केन्द्रीय कार्यालय रहेको स्थल मदननगर बल्खुमा पार्टी कार्यालयको शिलान्यास गर्ने निर्णय समेत गरेको छ ।
बैठकले समानुपातिक सांसदको हेरफेर, निर्वाचन आयोग र अदालत लगायतका संवैधानिक निकायमा पत्राचार गर्नेजस्ता सबै अधिकार अध्यक्ष ओलीलाई दिएको छ ।
यो निर्णयसँगै नेकपा एमालेमा अध्यक्ष ओली थप शक्तिशाली बनेका छन् । उनले माधव नेपाल पक्षसँग गुटगत संवाद नगर्ने तर, व्यक्तिगतरुपमा सबैलाई समेट्ने बताएका छन् ।
यो निर्णयसँगै एमाले ब्युँतिएपछि रक्षात्मक बनेको माधव नेपाल पक्ष थप कमजोर बनेको छ । नेपाल निकट सांसद र केन्द्रीय सदस्यहरु धमाधम ओलीलाई भेटेर संस्थापन पक्षमा लाग्ने क्रम बढेको छ ।
