काठमाडौं- नेपाल कम्युनिस्ट पार्टी माओवादी केन्द्रको सुर्खेत जिल्ला कमिटी सदस्य गंगाराम तिमिल्सेना नेकपा एमालेमा प्रवेश गरेका छन् ।
पार्टी प्रवेशका क्रममा उनले देशलाई समृद्धिको दिशामा अघि बढाउन एमालेमा प्रवेश गरेको प्रतिक्रिया दिएका छन् ।
‘देशलाई विकास र समृद्धि दिनसक्ने पार्टी एमाले नै हो । एमालेले मात्रै नेपालको कम्युनिस्ट आन्दोलनलाई एकताबद्ध गराउन सक्छ,’ उनले भने ।
एमालेको जिल्ला संगठनबारे आफू जानकार रहेको बताउँदै पार्टीले जस्तोसुकै जिम्मेवारी दिए पनि आफूले पुरा गर्ने उनले बताए ।
यस्तै माओवादी केन्द्रका वीरेन्द्रनगर नगर कमिटीका सदस्य डिल्लीप्रसाद कँडेल पनि एमाले प्रवेश गरेका छन् ।
उनीहरुलाई एमाले कर्णाली प्रदेश इन्चार्ज यामलाल कँडेलले पार्टी प्रवेश गराएका हुन् ।
पार्टी प्रवेश गराउँदै कँडेलले विगतको तिक्ततालाई बिर्सेर अघि बढ्ने र कँडेल र तिमिल्सेना प्रवेशसँगै एमाले जिल्लामा थप सक्रिय बन्ने अपेक्षा राखे ।
