पर्वत- ट्राफिक सचेतनाका लागि निरन्तर अभियान सञ्चालन भएसँगै पर्वतमा सवारी दुर्घटनाका घटनामा कमी आएको छ । सवारी दुर्घटना घटेसँगै वार्षिक मृत्यु हुनेको सङ्ख्या घट्दै जान थालेको छ ।
दुर्घटना न्यूनीकरणका लागि सवारी जाँचमा कडाइ र कारबाहीको प्रक्रिया अघि बढाएसँंगै दुर्घटना पनि कम हुँदै गएको हो । जिल्लामा आव २०७४/७५ मा छ वटा सवारी दुर्घटनामा तीन जनाको मृत्युका साथै ४६ घाइते भएका थिए । यसैगरी आव २०७५/७६ मा १५ वटा सवारी साधन दुर्घटनामा १५ जनाको मृत्यु र ७४ घाइते भएको जिल्ला ट्राफिक प्रहरी कार्यालयले जनाएको छ ।
आव २०७६/७७ मा १८ सवारी दुर्घटनामा सात जनाको मृत्यु र १६ जना घाइते भएका छन् । गत वर्ष १८ सवारी दुर्घटनामा १५ जनाले ज्यान गुमाएको भए पनि यो आवमा १२ सवारी दुर्घटनामा छ जनाले मात्र ज्यान गुमाएका हुन् ।
सवारी दुर्घटनामा ठूला सवारी साधनभन्दा पनि साना सवारी साधन बढी दुर्घटना हुने गरेको प्रहरीले बताएको छ । सडक सञ्जाल र यातायातका साधन बढ्दै जाँदा हरेक वर्ष सवारी दुर्घटनामा पनि कमी आउन थालेको छ । हालसम्मको तथ्याङ्कअनुसार सबैभन्दा बढी दुर्घटना मोटरसाइकलबाट भएको देखिन्छ । मोटरसाइकल दुर्घटनामा परी ज्यान गुमाउनेको सङ्ख्या केही बढी छ ।
पछिल्लो समय बढ्दो सवारी साधनको चाप, साँघुरो बाटो, क्षमताभन्दा बढी यात्रु बोक्ने, सडकको जीर्ण अवस्था र सडक निर्माणका नाममा ठेकेदारले वर्षौं लगाउँदा केही दुर्घटना भएको निमित्त ट्राफिक प्रहरी प्रमुख रेशम थापाले बताए ।
ट्राफिक नियम उल्लङ्घन, मादकपदार्थ सेवन गरी सवारी चलाउने र तीव्र गतिले सबैभन्दा बढी दुर्घटना भइरहेको उनको भनाइ छ । जिल्लामा भएका सवारी दुर्घटनामा धेरै चालकको गल्तीका कारण भएको अनुसन्धानले देखाएको छ । थापाका अनुसार २०७४ देखि २०७७ सम्म ४६ वटा सवारी साधन दुर्घटना भएका छन् ।
जसमा तीव्र गति, मादक पदार्थ सेवन गरेर सवारी चलाउँदा, यान्त्रिक गडवडी, ब्रेकफेल, स्टेरिङ फेल, यात्रुको गल्ती, सडक चौपाया र सडकको अवस्थाले गर्दा सवारी दुर्घटना भएको छ । पर्वतमा मापसे गरी सवारी साधन हाँक्दा कारवाही हुनेको सङ्ख्या पनि कम हुदै गएको छ । आव २०७५/०७६ मा ६० र आव २०७६/७७ मा २९ जना कारवाहीमा परेका छन् । उनीहरुलाई कारबाही गर्दा रु ८९ हजार बढी राजस्व सङ्कलन भएको छ ।
लकडाउनभन्दा पहिले दिनमा ट्राफिक जाँचमा कडाइ गर्ने प्रहरीले रातमा मापसे जाँचलाई निरन्तरता दिँदा मापसे गरी सवारी साधन हाँक्नेमा पनि उल्लेख्य कमी आएको उनले बताए ।
यसैबीच ट्राफिक प्रहरी कार्यालयले चालु आर्थिक वर्षको साउनयता नौ महिनामा रु २६ लाख ३८ हजार ८०० राजस्व सङ्कलन गरेको छ । ट्राफिक नियमविपरीत चलेका चार हजार १५० सवारी साधनलाई कारवाही गर्दा सो राजस्व सङ्कलन भएको ट्राफिक प्रहरी प्रहरी कार्यलय पर्वतले जनाएको छ ।
सबैभन्दा बढी एक हजार ८७० जीप तथा कार कारवाहीमा परेका छन् जसबाट रु ११ लाख ५५ हजार राजस्व सङ्कलन भएको छ । त्यसैगरी ३९० बस कारबाहीमा पर्दा रु दुई लाख ३० हजार ५०० सङकलन भएको छ । रु चार लाख ७० हजार ५०० ट्रकबाट, ६०९ ट्याक्टरबाट रु तीन लाख ६९ हजार, ५५० मोटरसाइकल कारवाही गर्दा रु चार लाख ३० हजार राजस्व सङ्कलन भएको कार्यालयले जनाएको छ ।
