काठमाडौं– नेकपा माओवादी केन्द्र परित्याग गरी नेकपा एमालेमा प्रवेश गरेका चार नेताको सांसद पद खोसिएपछि शुक्रबार फेरि मन्त्री पदको शपथ लिने भएका छन् ।
सांसद पद खोसिएका टोपबहादुर रायमाझी, लेखराज भट्ट, प्रभु साह र गौरीशंकर चौधरीलाई प्रधानमन्त्री केपी शर्मा ओलीले मन्त्री पदमा पुनर्नियुक्तिको सिफारिस गरेका हुन् ।
कारबाहीमा परेका नेताहरू उर्जा, जलस्रोत तथा सिंचाइ मन्त्री टोपबहादुर रायमाझी, उद्योग, वाणिज्य तथा आपूर्ति मन्त्री लेखराज भट्ट, शहरी विकास मन्त्री प्रभु साह र श्रम, रोजगार तथा सामाजिक सुरक्षा मन्त्री गौरीशंकर चौधरी हुन् ।
चारै जना माओवादी केन्द्रबाट प्रत्यक्ष निर्वाचित सांसद हुन् । उनीहरू साविकको नेकपा विभाजित हुँदा अध्यक्ष एवं प्रधानमन्त्री ओलीतिर लागेका थिए ।
पार्टीले गरेको कारबाहीका कारण पदमुक्त भएका चार मन्त्रीको आजै पुनर्नियुक्ति र सपथ हुने भएको छ । प्रधानमन्त्री ओलीले पदमुक्त भएका चारै जनालाई पुनर्नियुक्ति गर्न लागेका हुन् । उनीहरूको दिउँसो ५ बजे शीतल निवासमा शपथग्रहण कार्यक्रम राखिएको छ ।
प्रतिनिधिसभा सदस्य नभएको व्यक्ति पनि ६ महिनासम्म मन्त्री हुन पाउने संवैधानिक व्यवस्था अनुसार माओवादीबाट एमाले बनेका नेताहरूलाई पुनर्नियुक्ति दिइएको हो ।
६ महिनाभित्र उपचुनाव हुनुपर्ने भएकाले टोपबहादुर रायमाझी, लेखराज भट्ट, प्रभु साह र गौरीशंकर चौधरी त्यतिन्जेल मन्त्री हुन पाउँछन् । उपचुनावमा उनीहरू एमालेबाट उम्मेदवार बन्ने निश्चित प्रायः छ ।
उनीहरूलाई साविककै मन्त्रालयमा नियुक्त गरिएको हो । जसअनुसार भट्ट ओलीको सरकार गठन भएयता निरन्तर मन्त्री छन् भने रायमाझी, साह र चौधरी पुस ५ मा प्रनिनिधिसभा बिघटनपछि १० पुसमा पुर्नगठित मन्त्रिपरिषदमा सदस्य बनेका थिए।
त्यही बेला माओवादी केन्द्रबाट गएका मणिचन्द्र थापा खानेपानी तथा सरसफाई मन्त्री र दावा लामा तमाङ युवा तथा खेलकुद मन्त्रीमा नियुक्त भएका थिए । थापा र लामा भने गैरसांसद मन्त्री भएकाले नियुक्त भएको अवधिदेखि ६ महिनासम्म मन्त्री हुन पाउनेछन् त्यसपछि सांसपद बन्न नसकेमा प्रतिनिधिसभाको बाँकी अवधिभर मन्त्रीमा पुनः नियुक्त हुन नसक्ने व्यवस्था छ ।
हेर्नुहोस् भिडियो…
