मकवानपुर- पाटन उच्च अदालत, हेटौँडा इजलासले अनशनरत गंगामाया अधिकारीका छोरा कृष्णप्रसादको हत्याका अभियुक्तहरूलाई सफाइ दिएको छ ।
न्यायाधीशहरू चण्डीराज ढकाल र मेरिना श्रेष्ठको इजलासले १२ जना अभियुक्तलाई सफाइ दिने चितवन जिल्ला अदालतको फैसला सदर गर्ने निर्णय गरेको पाटन उच्च अदालत, हेटौंडा इजलासका उपरजिस्ट्रार कैलाश भट्टराईले जानकारी दिए ।
२०६१ सालको जेठ २४ गते चितवनको बकुलहरमा गंगामायाका कान्छा छोरा कृष्णप्रसादलाई तत्कालीन माओवादीले सुराकी गरेको आरोप लगाउँदै गोली हानेर हत्या गरेको थियो ।
उच्च सरकारी वकिलको कार्यालय हेटौँडाका प्रमुख सहन्यायाधीवक्ता सन्देश श्रेष्ठसहित तीनजना सरकारी वकिलले अभियुक्तहरूलाई कृष्णप्रसादको हत्या अभियोगमा कारबाही हुनुपर्ने माग गर्दै बहस गरेका थिए ।
उनीहरूको बहस सकिएपछि जाहेरीवालाका तर्फबाट अधिवक्ता पुष्पराज पौडेल र महामुनिश्वर आचार्यले बहस गरेका थिए ।
त्यसपछि प्रतिवादीका तर्फबाट वरिष्ठ अधिवक्ताहरू मुक्ति प्रधान, रमण श्रेष्ठ, चण्डेश्वर श्रेष्ठ, दिनमणि पोखरेललगायतले बहस गरे ।
२०७० चैत ३० मा छविलाल पौडेलसहित भीष्मराज पौडेल, रामप्रसाद अधिकारी, परशुराम पौडेल, कालीप्रसाद अधिकारी, हिमलाल अधिकारी, सीता अधिकारी, रामप्रसाद अधिकारी, मेघनाथ पौडेल, जानुका पौडेल, सुभद्रा तिवारी, विष्णु तिवारी र रुद्र आचार्यमाथि मुद्दा चलाइएको थियो ।
चितवन जिल्ला अदालतले फरार रहेका रुद्र आचार्य (अहिले नर्दन आयरल्याण्डमा बस्दै आएका) बाहेक सबै प्रतिवादीलाई २०७५ भदौ २४ मा सफाइ दिएको थियो ।
त्यसविरुद्ध २०७६ भदौ १८ मा पाटन उच्च अदालतको हेटौँडा इजलासमा पुनरावेदन गरिएको थियो ।
हत्यामा संलग्नलाई कारबाहीको माग गर्दै गंगामाया र उनका पति नन्दप्रसादले प्रहरी कार्यालयका साथै राष्ट्रिय तथा अन्तर्राष्ट्रिय मानव अधिकार संगठनहरूमा उजुरी दिए पनि कुनै कारबाही नभएपछि २०७० सालको साउन २८ गतेदेखि उनीहरूले आमरण अनशन थालेका थिए ।
नन्दप्रसादको अनशनकै क्रममा ज्यान गइसकेको छ भने गंगामाया अनशनमै छिन् ।
