काठमाडौं- सरकारले कोरोना भाइरस नियन्त्रणका लागि कोभिड-१९ संकट व्यवस्थापन केन्द्र (सीसीएमसी) ले गरेका विभिन्न सिफारिसलाई परिमार्जनसहित पारित गरेको छ ।
आन्तरिक उडान भने तत्काल नरोक्ने मन्त्रिपरिषदले निर्णय गरेको छ । आज साँझ बसेको मन्त्रिपरिषद् बैठक कोरोना रोकथामका विषयमा केन्द्रित थियो ।
बैठकले सीसीएमसीले वैशाख १५ गतेदेखि आन्तरिक हवाई उडान रोक्न सिफारिस गरे पनि मन्त्रिपरिषदले अहिले यसबारे निर्णय नगरेको परराष्ट्रमन्त्री प्रदिप ज्ञवालीले जानकारी दिए ।
‘अहिले स्वास्थ्य मापदण्डहरु पालना गरेर उडान यथावत सञ्चालन गर्ने कुरा भएको छ,’ उनले भने, ‘पछि आवश्यक पर्यो भने अर्को निर्णय लिन सकिन्छ ।’
सबै प्रकारका परीक्षा स्थगित गर्न सीसीएमसीले गरेको सिफारिस पनि मन्त्रिपरिषद्को बैठकले पारित गरेको छ ।
पहाडी क्षेत्रमा २०० र सहरी क्षेत्रमा ५०० भन्दा बढी सक्रिय संक्रमित भएमा निषेधाज्ञा लगाउनुपर्ने सीसीएमसीको सिफारिस पनि मन्त्रिपरिषद्को बैठकले पारित गरेको छ ।
