काठमाडौं- मुख्य विपक्षी दल नेपाली कांग्रेसले संसदीय दल कार्यसमितिको बैठक बोलाएको छ । बुधबार दिउँसो २:३० बजे संसद भवनको ल्होत्से हलमा बस्ने गरी बैठक बोलाएको हो ।
बैठकमा समसामयिक राजनीतिक विषयहरू र संसदको बजेट अधिवेशन लगायत विषयमा छलफल हुने प्रमुख सचेतक बालकृष्ण खाँणले जानकारी दिए ।
प्रधानमन्त्रीले विश्वासको मत लिने प्रयोजनका लागि गत २७ वैशाखमा संसदको विशेष अधिवेशन बसेको थियो । तर, प्रधानमन्त्रीले विश्वासको मत नपाएपछि स्थगित भएको संसद अधिवेशन सरकारले त्यसै राति अन्त्य गराएको थियो ।
३० वैशाखमै प्रधानमन्त्री केपी ओली पुनः संविधानको धारा ७६ (३) अनुसार अल्पमतको प्रधानमन्त्री नियुक्त भएका छन् । अब प्रधानमन्त्रीले ३० दिनभित्र विश्वासको मत लिनुपर्ने हुन्छ ।
कांग्रेस भने प्रधानमन्त्रीले विश्वासको मत लिन असफल बनाउने रणनीतिमा छ ।
प्रतिक्रिया दिनुहोस्
