प्रधानमन्त्री केपी शर्मा ओलीसँग सत्ता सहकार्य गर्न आतुर जनता समाजवादी पार्टीको महन्थ-राजेन्द्र पक्षले मागेको मन्त्रालय संख्या दिन नसकिने अडान ओलीले राखेका छन् ।
स्रोतका अनुसार अध्यक्ष महन्थ ठाकुरले ८ मन्त्री र २ राज्यमन्त्री मागिरहेका छन् । तर ओलीले ७ भन्दा बढी मन्त्री पद कुनै हालतमा दिन नसकिने अडान राखेका हुन् ।
‘अस्ति अदालतले खालि गरिदिएका ७ मन्त्रालय छन्, तपाईंहरू आउने भए आउनुस् नत्र ठीकै छ,’ ओलीको भनाइ उदृत गर्दै जसपाका एक नेताले सूत्रन्यूजसँग भने ।
आफ्ना अधिकांश मागहरू पूरा गरिदिएको भन्दै जसपाको ठाकुर पक्ष सरकारमा जाने तयारी गरेको हो । तर मन्त्रालय भागबण्डाको किचलोका कारण तत्काल निर्णय हुन सकिरहेको छैन ।
ओलीले बालुवाटारमा आफूनिकट प्रेस चौतारीका पत्रकारहरूसँग कुरा गर्दै मन्त्रीमण्डल पुनःगठन गर्ने जानकारी दिएका थिए । संवैधानिक प्रावधानअनुसार २५ भन्दा बढी मन्त्री राख्न पाइदैन ।
जसपाका अर्का अध्यक्ष उपेन्द्र यादवले भने ठाकुर-महतो पक्षलाई कारवाही गर्ने तयारी गरिरहेको छ ।
