वन तथा वातावरण मन्त्री प्रेम आलेले चीनबाट ल्याइएको अक्सिजन सिलिण्डरमा आफ्नो फोटो टाँसेर महामारीका बीचमा पनि ठूलो प्रचारमोह देखाएका छन् ।
अक्सिजन अभावमा कोरोना संक्रमितको मृत्यु हुन थालेपछि चीनले अनुदानमा २ हजार सिलिण्डर दिएको थियो । अनुदानमा आएका ती सिलिण्डरमध्ये १ सय २५ वटा सिलिण्डर उनले आफ्नो पदको दुरुपयोग गर्दै सुदूरपश्चिम लगेका थिए ।
सबै सिलिण्डरमा वनमन्त्री आलेको फोटोसहितको स्टिकर छ । त्यो मात्र नभएर उनले सुदूरपश्चिम लगेका अन्य औषधि, मास्क, अक्सिजन कन्ट्रेस्टरमा पनि उनको फोटो टाँसिएको देखिन्छ ।
आले डोटी जिल्लाबाट निर्वाचित एमालेका सांसद हुन् । यसअघि उनले रुखले कार्बनडाइअक्साइड फाल्ने र मान्छेले अक्सिजन फाल्ने भन्दै गरेको भाषण विवादित बनेको थियो ।
अहिले महामारीका बीचमा आलेले आफ्नो प्रचार मोह सार्वजनिक गरेका छन् । उनले अर्को देशले अनुदानमा दिएको सिलिण्डरमा आफ्नो स्टिकर टाँसेर महामारीविरुद्धको लडाईंलाई मजाक बनाएका छन् ।
