प्रतिनिधि सभाका पूर्व सभामुखहरूले आवश्यक परे संसद बैठक बोलाउन तयार हुनुपर्ने सुझाव दिएपछि सभामुख अग्निप्रसाद सापकोटाले थप कानूनी परामर्श गर्ने भएका छन् ।
गत शुक्रवार मध्यरातमा प्रधानमन्त्री ओलीको सिफारिसमा राष्ट्रपति विद्यादेवी भण्डारीले गरेको दोस्रोपटकको प्रतिनिधि सभा भंग गैरसंवैधानिक रहेको पूर्व सभामुखहरूको ठहर छ ।
सभामुख सापकोटाले मंगलवार पूर्व सभामुखहरूलाई बोलाएर परामर्श गरेका थिए । पूर्व सभामुखहरूसँगको परामर्शपछि सापकोटाले कानूनविदहरूसँग थप परामर्श गर्ने बताएका छन् ।
पूर्व सभामुख रामचन्द्र पौडेलले सञ्चारकर्मीहरूसँग भने – ‘प्रतिनिधि सभाको असंवैधानिक विघटन गरिएको छ । देशले सदनबाट नै निकास पाउनुपर्छ । त्यसैले आवश्यक परे संसदको बैठक बोलाउन पनि तयार हुन हामीले सभामुखलाई सुझाव दिएका छौं ।’
पौडेलले आफ्नो सुझावलाई सभामुख सापकोटाले सकारात्मक ढंगबाट लिएकोसमेत बताए ।
त्यस्तै आजको छलफलमा भाग लिएका अर्का एक पूर्व सभामुख भन्छन् – ‘अब सभामुखले आफ्नो विशेषाधिकार प्रयोग गरेर भएपनि संसद बैठक बोलाउनुपर्छ ।’
आजको बैठकमा एमालेका नेतासमेत रहेका पूर्व सभामुख सुवासचन्द्र नेम्वाङ भने सहभागी थिएनन् । उनले बिहानै फोन गरेर आफू उपस्थित हुन नसक्ने जानकारी सभामुख सापकोटालाई गराएका थिए ।
विशेषाधिकार प्रयोग गरेर संसद सुचारु गर्नुपर्ने बहस गत पुस ५ गतेको प्रतिनिधि सभा विघटनपछि पनि उठेको थियो । तर सापकोटा त्यसबाट पछि हटेका थिए । उनले त्यतिबेलै कानूनी परामर्श गरेको भएपनि संसद सुचारु गर्न कुनै कदम चालेका थिएनन् ।
यसपालि भने संविधानविद र पूर्वसभामुखहरूले दह्रो गरी खुट्टा टेक्न सभामुख सापकोटालाई सुझाव दिएका छन् । संविधानको धारा ७६ को उपधारा ५ बमोजिम सरकार गठन हुने व्यवस्था रहँदा रहँदै पनि ओलीको सिफारिसमा राष्ट्रपति भण्डारीले प्रतिनिधि सभा विघटन गरेर गैरसंवैधानिक काम गरेको उनीहरूको आरोप छ ।
संसद विघटनविरुद्ध प्रधानमन्त्री केपी शर्मा ओली र राष्ट्रपति विद्यादेवी भण्डारीलाई विपक्षी गठबन्धनले सर्वोच्च अदालतमा चुनौती दिएको छ ।
विघटित संसदका १ सय ४६ सांसदहरूले आफैं उपस्थित भएर प्रतिनिधि सभा पुनःस्थापना गर्नुपर्ने र कांग्रेस सभापति शेरबहादुर देउवालाई प्रधानमन्त्री बनाउन परमादेश जारी गर्नुपर्ने मागसहित रिट दर्ता गरेका हुन् ।
प्रतिनिधि सभाको दोस्रो विघटनविरुद्ध नागरिक समाजले आन्दोलन थालिसकेको छ भने विभिन्न दलका युवा र विद्यार्थी संगठनले विज्ञप्तिमार्फत ओली र भण्डारीको विरोध गरिरहेका छन् ।
