प्रधानमन्त्रीसमेत रहेका नेकपा एमालेका अध्यक्ष ओलीको कारवाहीमा परेका १५ स्थायी कमिटी सदस्यहरूले संयुक्त वक्तव्य निकालेर ओलीको उक्त कदमप्रति भर्त्सना गरेका छन् ।
वक्तव्यमा यसअघि ओलीतिरै लागेका ठानिएका नेताद्वय योगेश भट्टराई र गोकर्ण बिष्टसमेतको हस्ताक्षर रहेको छ ।
पार्टी एकता जीवन्त राख्न भन्दै दुवैतिर वार्तामा बस्ने गरेका ती नेताहरूले अन्तिम घडीमा नेता माधवकुमार नेपाललाई नै साथ दिएका छन् ।
नेपाली कांग्रेसका सभापति शेरबहादुर देउवालाई प्रधानमन्त्री बनाउन माग गर्दै अदालतमा पेश गरिएको रिटमा भने दुवैको नाम छैन ।
‘पार्टी महाधिवेशनको निर्णय र पार्टी विधान अनुरुप पार्टी सञ्चालन हुुनुपर्ने आवाज उठाउने पार्टीका नेता र कार्यकर्ता र सांसदहरु विरुद्ध अत्यन्त निरंकुश र हैकमवादी शैलीले पटक–पटक कथित कार्वाईको डण्डा चलाइएको छ,’ वक्तव्यमा भनिएको छ, ‘ यसै क्रममा हालै पार्टी निर्माणको आरम्भदेखि नै नेतृत्व दिनुभएका वरिष्ठ नेताहरु लगायत पार्टीको विकास र विस्तारमा महत्वपूर्ण योगदान गर्नुभएका महाधिवेशनबाट निर्वाचित पदाधिकारी समेतका नेताहरु एवम् सांसद गरी ११ जनालाई पार्टी सदस्यबाट निष्काशन गरिएको र १२ जनालाई स्पष्टीकरण सोधिएको निरकुंश तानाशाही निर्णय सार्वजनिक गरिएको छ । यस्तो स्वेच्छाचारी निर्णयको हामी घोर भत्र्सना गर्दछौं ।’
