सभामुख अग्निप्रसाद सापकोटाले प्रतिनिधि सभाको विघटनका सम्बन्धमा कानूनविदहरूसँग परामर्श गर्ने भएका छन् ।
बिहीवार अपराह्न १ बजे नयाँ बानेश्वरस्थित संसद भवनको लोत्से हलमा संविधानविद्, कानूनी एवं न्यायिक क्षेत्रका विज्ञ विशेषज्ञहरुसँग छलफल गर्ने भएको उनको सचिवालयले जनाएको छ ।
एक साता अघि सरकारको सिफारिसमा राष्ट्रपति विद्यादेवी भण्डारीले प्रतिनिधि सभाको दोस्रो विघटन गरिदिएकी थिइन् । त्यसयता सभामुख सापकोटा निरन्तर छलफल र परामर्शमा छन् ।
केही दिनअघि उनले पूर्व सभामुखहरूसँग छलफल गरेका थिए । पूर्व सभामुखहरूले सभामुखले विशेषाधिकार प्रयोग गरेर संसद ब्युँताउन सक्नेसमेत बताएका थिए । उनीहरूको सुझावलाई सभामुख सापकोटाले सकारात्मक रूपमा लिएका थिए ।
यता प्रतिनिधि सभा विघटनविरुद्ध परेका रिटहरूमा आजै सुनुवाइ हुँदैछ । प्रधानन्यायाधीश चोलेन्द्र शमशेर जबराको एकल इजलासमा प्रतिनिधि सभा विघटनविरुद्ध परेका १९ रिटहरूको सुनुवाइ हुन लागेको हो ।
