पूर्व अर्थमन्त्रीसमेत रहेका नेकपा एमालेका नेता सुरेन्द्र पाण्डेले बजेटबारे राजश्व नबढ्नु तर ऋण बढ्नुले अर्थतन्त्रमा चाप पर्ने प्रतिक्रिया दिएका छन् ।
आर्थिक वर्ष २०७८/७९ का लागि प्रस्तुत गरिएको बजेटमाथि टिप्पणी गर्दै उनले राजश्व उही रहने तर आन्तरिक र बाह्य ऋण बढ्ने अवस्थाले अर्थतन्त्रलाई फाइदा नगर्ने टिप्पणी गरेका हुन् ।
सूत्रन्यूजसँग कुरा गर्दै पाण्डेले भने – ‘नेपालको राजश्व तीन वर्षदेखि १० खर्बको हाराहारीमा उठेको देखिन्छ तर बजेट भने हरेक वर्ष बढ्छ । बजेटलाई आन्तरिक र बाह्य ऋणको प्रभावमा बढाउने हो भने अर्थतन्त्रमा चाप परिहाल्छ नि । यसका धेरै नकारात्मक साइड इफेक्ट हुन्छन् ।’
उनले ऋण लिएर घिउ खाने प्रचलन ठीक नभएको बताए ।
उनले अहिले ल्याइएको बजेटमा शिक्षा र स्वास्थ्यलाई बढी प्राथमिकता दिइनु राम्रो रहेको बताए । तर कार्यान्वयनमा भने शंका रहेको उनको टिप्पणी छ ।
‘शिक्षा र स्वास्थ्यमा ध्यान दिनु राम्रो कुरा हो,’ उनले भने, ‘स्वास्थ्यमा सबै फोकस कोरोनाको खोपतिर दिनुपर्थ्यो । खोप दिएर नागरिकलाई आर्थिक क्रियाकलापमा सहभागी हुन पठाउन सकिन्थ्यो । तर स्वास्थ्यमा आएको बजेट पनि छिरलिएको अवस्था छ ।’
