नेपाली कांग्रेसका सभापति शेरबहादुर देउवाले सरकारविरुद्ध कांग्रेस आन्दोलनमा जान खोजेको तर कोरोनाले अप्ठेरो पारेको बताएका छन् ।
आइतवार देउवानिवास बुढानीलकण्ठमा बसेको भेलामा देउवाले सरकारको असंवैधानिक कदमविरुद्ध आन्दोलनमा जानुपर्ने आवश्यकता जनाएका हुन् । उनले ओली सरकारको राजनीतिक प्रतिवाद गर्ने समेत बताए ।
‘सभापति देउवाले आन्दोलनमा जानु अपरिहार्य रहेको तर अहिले कोरोना महामारीका कारण गइहाल्ने स्थिति नभएको भनेर आफ्नो कुरा राख्नुभयो,’ भेलामा सहभागी कांग्रेसका अर्का एक नेताले सूत्रन्यूजसँग भने ।
भेलामा माओवादी केन्द्रका अध्यक्ष पुष्पकमल दाहाल ‘प्रचण्ड’, एमालेका नेता माधवकुमार नेपाल, जसपाका अध्यक्ष उपेन्द्र यादव, कांग्रेसकै केही पदाधिकारीलगायत सहभागी भएका थिए ।
छलफलमा प्रचण्डले अध्यादेशमार्फत बजेट आएकोमा असन्तुष्टि जनाएका थिए ।
‘ओलीको चुनावी घोषणापत्र जस्तो बजेट आयो, त्यो पनि असंवैधानिक तरिकाले,’ प्रचण्डको भनाइ उदृत गर्दै अर्का एक नेताले भने ।
बैठकले सरकारका कदमबारे संयुक्त विज्ञप्ति निकालेर विरोध गर्ने निर्णय गरेको छ ।
हेर्नुहोस् विज्ञप्ति –
