कोरोना संक्रमितको संख्या गत ५१ दिन यताको नै कम
एजेन्सी । कोरोना भाइरस संक्रमणको उच्च जोखिममा रहेको भारतमा कोरोनाभाइरस संक्रमणको दर ओरालो लागेको छ ।
पछिल्लो २४ घण्टामा भारतमा १ लाख २७ हजार ५१० जनामा थप व्यक्तिमा कोरोना संक्रमण पुष्टि भएको छ । योसँगै देशभर हालसम्म कूल २ करोड ८१ लाख ७५ हजार ४४ व्यक्ति कोरोना संक्रमित भएका छन् ।
यो तथ्यांक गत ५१ दिन यताको नै कम भएको केन्द्रीय स्वास्थ्य तथा परिवार कल्याण मन्त्रालयले मंगलबार जनाएको छ ।
त्यस्तै २४ घण्टाको अवधिमा २ हजार ७९५ जनाको कोभिड–१९ को संक्रमणबाट मृत्यु भएको छ । हालसम्म भारतमा कोरोनाबाट ३ लाख ३१ हजार ८९५ जनाको ज्यान गइसकेको छ ।
भारतमा हालसम्म ३४ करोड ६७ लाख ९२ हजार २५७ व्यक्तिको कोरोना परिक्षण गरिएको सरकारी स्रोतले जानकारी दिएको छ ।