विपद्का सहयात्री उर्फ जोन घलेले कोरोनाको दोस्रो लहरमा गोर्खाको विकट ठाउँ मानिने धार्चेसहित अन्य ठाउँमा आवश्यक खाद्यान्नसहित स्वास्थ्यसामग्री वितरण गरेका छन् ।
विपदका बेला सामाजिक सेवा गरिरहने घलेले सवारी साधनबाट ढुवानी गर्न नसकिने क्षेत्रहरुमा पनि मानिस तथा खच्चडबाट खाद्यान्न ढुवानी गरेर पीडितलाई सहयोग गरेका हुन् । धार्चे ७ मा पर्ने ठाँटी भन्ने ठाउँमा रहेका ३२ घर धुरीमा खच्चडबाट चामल, दाल, नुन, तेल लगायत खाद्यान्न सामग्री ढुवानी गरी वितरण गरिएको घलेले बताए ।
धार्चेको भिरकुना, खानीगाउँ, खानीबेंसी, लापुबेंसी, लिदिङ लगायतका ठाउँहरुमा दुई सय ७५ घुरधुरीका परिवारलाई उनले खाद्यान्न सहयोग गरेका हुन् ।
उक्त खाद्यान्न उनका आफन्त राम मगर र सन्तोष घलेले हस्तान्तरण गरेका थिए । गाउँपालिकाका सबै वडाहरुमा गरी २ सय ६५ घरधुरीमा खाद्यान्न पुगेको घलेले जानकारी दिए ।
राहत अभियानमा स्थानीय जनप्रतिनिधिले पनि उनलाई सघाएका छन् । प्रतिनिधि सभा क्षेत्र नम्बर १ का निवर्तमान सांसद हरिराज अधिकारी, उनका व्यवसायी सहयोगी कृष्ण घिमिरे, परिमार्जन राम मगर, सन्तोष गुरुङ, पुनम गुरुङ, सन्त गुरुङ (विष्फोट)ले समेत अभियानलाई सार्थक बनाउन सहयोग गरेको घलेको भनाइ छ ।
घलेले २०७२ सालको भूकम्पमा पनि यस्तै सामाजिक सहयोग अभियान संचालन गरेका थिए । सामान्य किसान परिवारमा जन्मेका घले अहिले अष्ट्रेलियाको मेलबर्नमा परिचित व्यवसायी बनेका छन् ।
घलेले पहिलो लकडाउनमा जिल्लाका विभिन्न स्थानमा गरी पाँच सय बोरा चामल, पाँच सय किलो दाल र पाँच सय लिटर खाने तेल वितरण गरेका थिए ।
अभियानले गोरखामा क्रियाशिल पत्रकारहरुलाई पनि समेटेको छ । पत्रकार तथा सञ्चारकर्मीहरुलाई पनि सहयोग गर्नुपर्छ भनी अत्यावश्यक स्वास्थ्य सामग्री उपलब्ध गराएको घलेले बताए ।
जसअन्तर्गत गोरखा पत्रकार महासंघका अध्यक्ष नरहरि सापकोटालाई स्थानीय पत्रकारहरुको उपस्थितिमा स्वास्थ्य सामग्री हस्तारतरण गरिएको थियो ।
