काठमाडौं- आइतबारदेखि मनसुन देशभरि फैलिएको छ । मौसम पूर्वानुमान महाशाखाले आइतबार जारी गरेको चौथो विशेष मौसम बुलेटिनअनुसार जेठ २८ गते पूर्वी क्षेत्र हुँदै भित्रिएको मनसुन आजबाट देशैभर फैलिएको हो ।
यस साता मनसुन सक्रिय भई देशका धेरै स्थानमा हल्कादेखि मध्यम, केही स्थानमा भारी र थोरै स्थानमा धेरै भारी वर्षाको सम्भावना रहेकाले आवश्यक सतर्कता अपनाउन महाशाखाले सम्बन्धित सबै पक्षलाई अनुरोध गरेको छ ।
मौसम पूर्वानुमान महाशाखाले आज देशका प्रदेश नं १, प्रदेश नं २, गण्डकी प्रदेश र लुम्बिनी प्रदेशका केही स्थानहरुमा भारी वर्षाको समेत सम्भावना भएकाले आवश्यक सतर्कता अपनाउन अनुरोध गरेको छ ।
महाशाखाले मौसम पूर्वानुमान जारी गर्दै देशका धेरै स्थानहरुमा मेघगर्जन, चट्याङ्ग सहित हल्कादेखि मध्यम वर्षाको सम्भावना रहेको जनाएको छ ।
बिहानैदेखि देशभर सामान्यदेखि पूर्ण बदली रही बागमती, गण्डकी, लुम्बिनी प्रदेश, कर्णाली र सुदूरपश्चिम प्रदेशका केही र बाँकी प्रदेशका एक-दुई स्थानहरुमा वर्षा भईरहेको महाशाखाले जनाएको छ ।
यस्तै, राति देशभर सामान्य देखि पूर्ण बदली रहनेछ ।
जेष्ठ ३१
आगामी ३ दिन मझौला नदीहरु कमला,बागमती,पूर्वी राप्ती,तिनाउ,पश्चिम राप्ती,बबई र यसका केहि स-साना नदीजलाधारमा क्षणिक मध्यम/भारी बर्षा भई बहाब केहि बढ्ने र केहिमा आकस्मिक बहाब(Flash Flood) पनि हुन सक्ने पूर्वानुमान रहेकोले साना नदी तटिय क्षेत्रमा सतर्कता अपनाउन हुन अनुरोध छ। pic.twitter.com/4NoOAjQgFX— Nepal Flood Alert! नेपाल बाढी सूचना! (@DHM_FloodEWS) June 14, 2021
