काठमाडौं- नेपाली कांग्रेसको केन्द्रीय कार्यसमिति बैठक बस्दै छ ।
आज दिउँसो २ बजे पार्टी केन्द्रीय कार्यालय, सानेपामा केन्द्रीय कार्यसमिति बैठक बस्न लागेको कांग्रेसका मुख्यसचिव कृष्णप्रसाद पौडेलले बताए । उनकाअनुसार १४ औं महाधिवेशनका विषयमा छलफल गर्न केन्द्रीय कार्यसमिति बैठक बस्न लागेको हो ।
यसअघि कांग्रेस पदाधिकारी बैठकले १४ औं महाधिवेशन केही दिन पछाडि सार्ने प्रस्ताव गरेको थियो । बैठकमा भदौ १६ गतेबाट महाधिवेशन गर्ने प्रस्ताव गरिएको थियो । यसअघि भदौ ७ गतेदेखि महाधिवेशन गर्ने तय भएको थियो ।
पदाधिकारी बैठकले गरेको प्रस्तावका विषयमा केन्द्रीय कार्यसमिति बैठकबाट निर्णय हुने जनाएको छ । यससँगै महाधिवेशन कसरी गर्ने भन्ने विषयमा पनि छलफल हुने उनले बताए ।
कोभिड महामारीका कारण क्रियाशील सदस्यता वितरण र नवीकरणका काममा ढिलाइ भएको छ । जसले गर्दा पूर्वनिर्धारित कार्यतालिकामा केही हेरफेर गरिने जनाएको छ ।
