काठमाडौं– सर्वोच्च अदालतले मन्त्रिपरिषद विस्तारको निर्णय तत्काल कार्यान्वयन नगर्न अन्तरिम आदेश गरेको छ ।
मन्त्रिपरिषद विस्तारविरुद्ध परेको रिटमाथि आज भएको सुनुवाइमा प्रधानन्यायाधीश चोलेन्द्र शमशेर राणा र न्यायाधीश प्रकाशकुमार ढुंगानाको संयुक्त इजलासले मन्त्रिपरिषद विस्तारको निर्णय तत्काल कार्यान्वयन नगर्न अन्तरिम आदेश दिएको हो ।
मन्त्रिपरिषद विस्तारविरुद्ध परेको रिटमाथि छलफल चल्दै गर्दा उपप्रधानमन्त्री राजेन्द्र महतो भने हेलिकोप्टर चढेर सिन्धुपाल्चोक गएका थिए ।
उनी काठमाडौंआउन नपाउँदै उनको मन्त्री चट् गएको हो ।
प्रधानमन्त्री केपी शर्मा ओलीले गत जेठ २१ गते र २७ गते गरी पछिल्लो समय दुईपटक मन्त्रिपरिषद बिस्तार गरेका थिए ।
सर्वोच्चको आदेशले अहिले जम्मा ५ सदस्यीय मन्त्रिपरिषद बचेको छ ।
जेठ २१ गते मन्त्री बनेकाहरू जम्मा १८ दिन पदमा रहे भने जेठ २७ गते मन्त्री बनेकाहरू जम्मा १२ दिन कुर्ची सम्हाल्न पाए ।
