काठमाडौं- युरोकप फुटबल समूह एफको अन्तिम खेलमा पोर्चुगलका स्टार क्रिस्टियानो रोनाल्डोमाथि कोकाकोलाको बोतल प्रहार भएको छ ।
हंगेरीको बुडापेस्टमा बुधबार राति भएको खेलमा फ्रान्सविरुद्ध २ गोल गर्दै खुसीयाली मनाइरहेका रोनाल्डोमाथि अचानक एक समर्थकले कोकको बोतल प्रहार गरेका हुन् ।
५८औं मिनेटमा पेनाल्टी क्षेत्रभित्र डिफेन्डर जुल्स कुन्डेले ह्यान्ड गरेपछि रोनाल्डोले पेनाल्टी हान्ने अवसर प्राप्त गरेका थिए । रोनाल्डोले गरेको प्रहार गोलरक्षक लोरिसले ठम्याउन नसक्दा गोलमा परिणत भएको थियो ।
सोही समय खुसीयाली मनाउन मैदानको छेउको भाग पुगेका रोनाल्डोमाथि कोकको बोतल प्रहार भएको हो । उनलाई कुनै चोटपटक भने नलागेको बताइएको छ ।
यसअगाडी रोनाल्डोले हंगेरीविरुद्धको सुरुवाती खेल अघिको पत्रकार सम्मेलनका दौरानमा चर्चित पेय पदार्थ कोका कोलाको बोतल हटाउँदा यसको असर शेयर बजारमा देखिएको थियो ।
