बिरामी भएर स्वास्थ्य लाभ गरिरहेका एमाले नेता रघुजी पन्त आफू स्थायी कमिटीमा परेकोमा आफूलाई खुसी नलागेको बताएका छन् ।
सूत्रन्यूजसँग कुरा गर्दै उनले माधव नेपालसँग सहमति नगरी गरेको बढुवाको कुनै अर्थ नरहेको टिप्पणी गरे ।
तपाईलाई बधाई दिउँकि नदिउँ भनेर सूत्रन्यूजले सोधेको प्रश्नमा पन्तले भने – ‘माधव कमरेडसँग सहमति गर्नु छैन । आफूआफू बैठक बसेर केके निर्णय गरे-गरे । यसबारेमा मलाई थाहा छैन । केको बधाइ ?’
आज बसेको महाधिवेशन आयोजक कमिटीको बैठकले एमालेकै ४ र माओवादी केन्द्रबाट आएका ४ जनालाई स्थायी कमिटीमा लैजाने निर्णय गरेको थियो ।
एमालेबाट रघुवीर महासेठ, रघुजी पन्त, विष्णु रिमाल र वेदुराम भुसाललाई स्थायी कमिटीमा लगिएको छ भने माओवादी केन्द्रबाट आएका रामबहादुर थापा, टोपबहादुर रायमाझी, लेखराज भट्ट र मणि थापालाई स्थायी कमिटी सदस्य बनाउने निर्णय गरेको थियो ।