प्रधानमन्त्रीसमेत रहेका एमालेका अध्यक्ष केपी शर्मा ओलीले पार्टीकै असन्तुष्ट समूहका नेता माधवकुमार नेपाललाई फोन गरेर केन्द्रीय कमिटीको बैठकमा बोलाएका छन् ।
पार्टी कार्यालय सचिव शेरबहादुर तामाङका अनुसार ओलीले शुक्रवार बिहान फोन गरेर नेपाललाई बैठकमा सहभागी हुन आग्रह गरेका हुन् ।
‘बैठकमै आउनुस्, तपाईंका असन्तुष्टिहरू त्यहीं छलफल गरौँला,’ ओलीको भनाइ उदृत गर्दै तामाङले बताए ।
ओलीले गत फागुन २८ गते केन्द्रीय कमिटी भंग गरेर महाधिवेशन आयोजक कमिटी गठन गरेका थिए । अदालतले आयोजक कमिटीको वैधतामा प्रश्न उठाएपछि २ दिनअघि पुनः केन्द्रीय कमिटी ब्युँताइएको थियो ।
ब्युँतिएको केन्द्रीय कमिटीको बैठक शुक्रवार बालुवाटारमा बस्दैछ ।
ओली समूहले वैधानिकताविपरित निर्णय गरेको भन्दै नेपाल समूहका नेताहरू थप असन्तुष्ट बनेका थिए ।
बिहीवार आफूनिकट नेताहरूलाई छलफलमा बोलाएर नेपालले ओलीले बोलाएको बैठकमा नजाने निर्णय गराएका थिए ।
