नेपाली कांग्रेसका सभापति शेरबहादुर देउवालाई प्रधानमन्त्री बनाउन परमादेश माग गर्दै एमालेमा असन्तुष्ट रहेका २३ सांसदले गरेको हस्ताक्षर भोलि (सोमवार) ५ बजेसम्म फिर्ता गर्न प्रधानमन्त्रीसमेत रहेका अध्यक्ष केपी शर्मा ओलीले चेतावनी दिएका थिए ।
शुक्रवार बसेको केन्द्रीय कमिटी बैठकमा हस्ताक्षर फिर्ता गर्न निर्देशनसमेत दिइयो । तर असन्तुष्ट समूहको नेतृत्व गरिरहेका वरिष्ठ नेता माधवकुमार नेपालले चेतावनीको कुनै ‘टेरपुच्छर’ लगाएका छैनन् ।
उनले ओलीको चेतावनीलाई ‘यस्ता चेतावनी कति आयो कति गयो’ भन्ने हिसाबले लिएका छन् ।
नेपाल समूहले हस्ताक्षर फिर्ता लिनु भनेको आफ्नै मृत्युपत्रमा हस्ताक्षर गर्नु हो भनिसकेको छ । हस्ताक्षर फिर्ता लिने समय घर्किदै गर्दा एमालेका नेताहरूको दौडधूपसमेत तीव्र बनेको छ ।
आज (आइतवार) बिहान अर्थमन्त्रीसमेत रहेका एमालेका उपमहासचिव विष्णु पौडेल, स्थायी कमिटी सदस्यद्वय शंकर पोखरेल र सुवासचन्द्र नेम्वाङ नेपालनिवास कोटेश्वर पुगेका छन् ।
कोटेश्वरमा ओली पक्षका नेताहरूले पार्टीलाई एकताबद्ध बनाएर अघि बढ्न हस्ताक्षर फिर्ताको कुनै विकल्प नरहेको बताउँदै नेता नेपाललाई कन्भिन्स गर्ने प्रयास गरेका थिए । ओलीले पनि भनेका थिए – ‘सर्वोच्चको फैसला आउनुअघि नै हस्ताक्षर फिर्ता नगर्नेहरू एमालेका नेता कार्यकर्ता होइनन् ।’
तर नेता नेपाल भने अदालती प्रक्रियामा गइसकेकाले कुनै हालतमा हस्ताक्षर फिर्ता नहुने बताइसकेका छन् । ‘हामी हस्ताक्षर फिर्ता लिंदैनौं,’ नेपाल समूहका एक नेताले सूत्रन्यूजसँग भने, ‘बरू ओलीले प्रतिनिधि सभा विघटन गलत थियो भनेर सार्वजनिक रूपमा माफी माग्नुपर्छ ।’
पछिल्लो समय न त हस्ताक्षर फिर्ता हुने, न त ओलीले प्रतिनिधि सभा विघटन गलत थियो भनेर सार्वजनिक माफी माग्न सक्ने स्थिति बनेको छ ।
