एमाले एकताका लागि गठित कार्यदलका सदस्य रघुजी पन्तले आज बसेको कार्यदल बैठक सकारात्मक भएको दाबी गरेका छन् ।
सिंहदरबारमा बसेको बैठकपछि सञ्चारकर्मीहरूसँग कुरा गर्दै नेता पन्तले भने, ‘छलफल सकारात्मक दिशातर्फ गइरहेको छ । अहिलेसम्म निष्कर्ष निस्किएको छैन । हामी फेरि भोलि बैठक बस्छौं ।
नेता पन्तले आज बुँदागत रूपमा छलफल भएको बताए । तर कुन बुँदामा छलफल भयो, त्यो चाहिँ भनेनन् ।
‘हिजो बैठकमात्र बसेको थियो, आज केही विषयमा बुँदागत छलफल भयो । थप छलफल भोलि गर्छौं,’ नेता पन्तले भने ।
उनले अध्यक्ष केपी शर्मा ओली र वरिष्ठ नेता माधवकुमार नेपालबीचको संयुक्त वक्तव्यका विषयमा प्रवेश नै नगरेको बताए ।
‘संयुक्त वक्तव्यका विषयमा हामी प्रवेश गरेका छैनौ अहिलेसम्म,’ नेता पन्तले भने ।
एमालेमा विग्रह बढ्दै गएर फूटको संघारमा पुगेपछि गत जेठ २ गते अध्यक्ष ओली र नेता नेपालका ५/५ प्रतिनिधि सम्मिलित कार्यदल गठन गरिएको थियो ।
कार्यदलमा ओली समूहका तर्फबाट सुवासचन्द्र नेम्वाङको नेतृत्वमा विष्णुप्रसाद पौडेल, प्रदीप ज्ञवाली, शंकर पोखरेल र विष्णु रिमाल छन् भने नेपाल समूहको तर्फबाट भीम रावलको नेतृत्वमा सुरेन्द्र पाण्डे, घनश्याम भुसाल, गोकर्ण बिष्ट र रघुजी पन्त रहेका छन् ।
बीचमा ओलीले कार्यदलका सदस्य रावललाई पार्टीबाट नै निष्कासन गर्ने गरी कारवाही गरेपछि कार्यदलको औचित्य समाप्त भएको थियो । तर कार्यदलका सदस्यहरू अनौपचारिक भेटवार्तामा भने थिए ।
पछिल्लो पटक सोमवार (हिजो) कार्यदललाई औपचारिक रूपमा ब्युँताइयो । हिजो र आज गरेर दुईपटक बैठक बसिसकेको छ तर ठोस निष्कर्ष भने निस्किएको छैन ।
आज कार्यदलको बैठक बसिरहेका बेला नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ नेता नेपालनिवास कोटेश्वर पुगेका थिए ।
