हिजो बिहीबार राति आफ्नै अपार्टमेन्टमा आत्महत्या गरेकी नायीका जेनी कुँवरको शुक्रबार पशुपति आर्यघाटमा अन्त्येष्टी गरिएको छ ।
उनलाई श्रद्धाञ्जली दिन चलचित्र विकास बोर्डका अध्यक्ष दयाराम दाहाल, चलचित्र कलाकार संघका उपाध्यक्ष मोहन निरौलालगायत उपस्थित रहेका थिए ।
उनको शवमा कलाकार संघको झण्डा समेत ओढाइएको थियो ।
उनको कोठामा सुसाइड नोट पनि भेटिएको छ । अपार्टमेन्टमा भेटिएको सुसाइड नोटमा जेनीले आफू डिप्रेसनको शिकार भएको तथा आफ्नो मृत्युमा ‘कसैको दोष नभएको’ उल्लेख गरेकी छन् ।
उनले नोटमा आत्महत्या अरुको कारणले नभई आफ्नै कारणले गरेको बताएकी छन् ।
श्रीमान अपार्टमेन्टमा नभएको बेलामा उनले आत्महत्या गरेकी हुन् ।
उनी अनामनगरस्थित एक अपार्टमेन्टमा एक्लै बस्दै आएकी थिइन् । केही समय कलाकारितामा लागेकी कुँवर पछिल्लो समय धार्मिक क्रियाकलापमा संलग्न थिइन् ।
कुँवरले ‘घायल’ र ‘हलचाल’ नामक चलचित्र निर्माण गरेकी थिइन् । उनी ‘मैदान’, ‘बज्रपात’ लगायत आधा दर्जन चलचित्र तथा टेलिसिरियलमा पनि अभिनय गरेकी थिइन् ।
