काठमाडौं- ब्राजिलका स्टार नेमार जुनियरले अर्जेन्टिनाका लियोनल मेस्सीलाई चुनौती दिँदै सन्देश पठाएका छन् । नेमारले मेस्सी आफ्नो घनिष्ठ मित्र भएको बताउँदै मेस्सी विश्वकै उत्कृष्ट खेलाडी भएको स्वीकारेका हुन् ।
आइतबार नेपाली समयअनुसार बिहान ५ बजेर ४५ मिनेटमा हुने खेलमा मेस्सी आफ्नो प्रतिद्वन्द्वी भएको र आफूले ब्राजिलको लागि पहिलो कोपा अमेरिका जित्न अर्जेन्टिनालाई हाराउनु पर्ने बताएका छन् ।
द मिररसँग नेमारले भनेका छन्, ‘मेस्सी मैले देखेको सबैभन्दा राम्रा खेलाडी हुन् र उनी मेरा एक महान साथी पनि हुन्, तर अब हामी फाइनलमा छौं, हामी प्रतिद्वन्द्वी हौं । म मेरो जीवनकै पहिलो कोपा अमेरिका जित्न चाहन्छु ।’
‘मेस्सीले कयौं वर्षदेखि राष्ट्रिय टिमबाट पहिलो उपाधि प्रतिक्षा गरिरहेका छन् । जब हामी प्रतिस्पर्धामा थिएनौं मैले उसलाई समर्थन जनाए । सन् २०१४ को विश्वकपमा पनि म मेस्सीको साथमा थिए’ उनले भने, ‘तर अहिले हामीबीच जस्तो सम्बन्ध र सम्मान भएता पनि उपाधि एक जनाले मात्र जित्छ ।’
‘जब तपाईं कसैसँग साथी बन्नुहुन्छ त्यो भुल्न गाह्रो हुन्छ तर जब हामी भिडिओगेम खेल्छौं हामी जित्न नै चाहन्छौं । आइतबार पनि त्यसै हुनेछ’ उनले भने ।
