सर्वोच्च अदालतले कांग्रेस सभापति शेरबहादुर देउवालाई प्रधानमन्त्री बनाउन परमादेश जारी गरेपछि विपक्षी गठबन्धनमा उत्साह छाएको छ ।
नेपाली कांग्रेस, माओवादी केन्द्र, एमालेको माधवकुमार नेपाल समूह, जनता समाजवादी पार्टीका उपेन्द्र यादव समूह र राष्ट्रिय जनमोर्चा सम्मिलित विपक्षी गठबन्धनको बैठक केही बेरमा बस्ने तयारी भइरहेको छ ।
माओवादी केन्द्रका प्रवक्ता नारायणकाजी श्रेष्ठले सर्वोच्चको फैसलाले लोकतन्त्र र संविधानको रक्षा गरेको प्रतिक्रिया दिएका छन् । त्यस्तै कांग्रेसका वरिष्ठ नेता रामचन्द्र पौडेलले पनि संविधानको रक्षा भएको प्रतिक्रिया दिएका छन् ।
फैसलामाथि नेता नेपालले सकारात्मक प्रतिक्रिया दिएका छन् ।
गत जेठ ७ गते मध्यरातमा प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले प्रतिनिधि सभाको दोस्रोपटक विघटन गरेकी थिइन् ।
विघटन बदर गर्न र देउवालाई प्रधानमन्त्री बनाउन माग गर्दै १ सय ४६सांसदहरूले अदालतमा रिट हालेका थिए ।
प्रधानन्यायाधीश चोलेन्द्र शमशेर जबरा नेतृत्वको संवैधानिक इजलासले रिट जारि गरिदिएको हो ।