राष्ट्रपति विद्यादेवी भण्डारीले राष्ट्रिय सभाको अधिवेशन अन्त्य गरेकी छन् ।
दोस्रोपटक विघटन गरिएको प्रतिनिधि सभा पुनःस्थापना र कांग्रेस सभापति शेरबहादुर देउवालाई प्रधानमन्त्री नियुक्त गर्ने सर्वोच्च अदालतको परमादेशपछि केपी शर्मा ओलीको सिफारिसमा राष्ट्रपतिले राष्ट्रिय सभाको अधिवेशन अन्त्य गरिदिएकी हुन् ।
अदालतको आदेशपछि प्रधानमन्त्री र राष्ट्रपतिले पहिलो ‘मूभ’ गरेका हुन् ।
आज राति १२ बजेदेखि अधिवेशन अन्त्य गरिएको संघीय संसदका महासचिव भरतराज गौतमले एक सूचनामार्फत जानकारी दिएका छन् ।
आज बसेको मन्त्रिपरिषद बैठकको सिफारिसमा राष्ट्रपतिले चालू रहेको राष्ट्रिय सभा अधिवेशन अन्त्य गरेको सूचनामा दाबी गरिएको छ ।
सर्वोच्च अदालतले कांग्रेस सभापति शेरबहादुर देउवालाई प्रधानमन्त्री नियुक्त गर्ने परमादेशसहित संसद पुनःस्थापना गरिदिएपछि भएको अधिवेशन अन्त्यलाई चासोका साथ हेरिएको छ ।
