नेकपा माओवादी केन्द्रले कांग्रेस सभापति शेरबहादुर देउवा नेतृत्वको मन्त्रिमण्डलमा पठाउने मन्त्रीहरू छान्ने जिम्मा अध्यक्ष पुष्पकमल दाहाल ‘प्रचण्ड’लाई दिएको छ ।
आज पेरिसडाँडामा बसेको स्थायी कमिटी बैठकपछि प्रवक्ता नारायणकाजी श्रेष्ठले सञ्चारकर्मीहरूसँग कुरा गर्दै देउवासँग छलफल गर्ने जिम्मा अध्यक्ष प्रचण्डको रहेको बताए ।
‘हाम्रो पार्टीका अध्यक्ष पुष्पकमल दाहाल ‘प्रचण्ड’ले भावी प्रधानमन्त्री शेरबहादुर देउवासँग सरकार संचालनका निम्ति आवश्यक विविध विषयमा प्रारम्भिक छलफल गर्ने र सरकारको स्वरूपका विषयमा ठोस छलफल गर्ने र पहल गर्नका लागि कुराकानी अघि बढाउने निर्णय भएको छ,’ श्रेष्ठले भने ।
उनले आजै दिउँसो १ बजे सभापति देउवासँग कुराकानी हुने बताए ।
सर्वोच्च अदालतले प्रतिनिधि सभा विघटनको निर्णयलाई असंवैधानिक करार गर्दै सभापति देउवालाई प्रधानमन्त्री बनाउन परमादेश जारी गरेको थियो । यससँगै आज अपराह्न ५ बजे देउवाले प्रधानमन्त्रीको नियुक्ति लिनेछन् ।