काठमाडौँ । नेकपा एमालेका वरिष्ठ नेता माधवकुमार नेपालले एमालेका अध्यक्ष केपी शर्मा ओलीसँग पार्टी एकताको ढोका बन्द भएको संकेत गरेका छन् । अब देशमा एमालेसहितको राष्ट्रिय सरकार बनाउनुपर्ने उनको तर्क छ ।
बिहीबार कोटेश्वर आफ्नै निवासमा नेपाली काँग्रेसका सभापति तथा प्रधानमन्त्री शेरबहादुर देउवासँग भेटवार्ताको क्रममा उनले यस्तो बताएका हुन् ।
नेता नेपालले प्रधानमन्त्रीलाई विश्वासको मत दिने भनेर आश्वासन समेत दिएका छन् । प्रधानमन्त्री देउवाले ३० दिनभित्र विश्वासको मत लिइसक्नुपर्छ ।
यता प्रधानमन्त्री पदबाट मुक्त भएपछि ओलीले बालुवाटारबाट बालकोट जाने बित्तिकै नेता नेपाललाई एमालेमा ठाउँ नभएको बताएका थिए । उनले नेपाललाई अन्य थुप्रै गालीसमेत गरेका थिए ।
ओलीको यस्तो अभिव्यक्तिले पार्टी एकताका लागि गरिएको १० बुँदे सहमतिमा पनि असर पर्न सक्ने माधव पक्षका नेताहरुको विश्लेषण रहेको छ ।
