काठमाडौं- दुई वर्षदेखि तलब नपाएपछि नेपाल रिपब्लिका मिडिया प्रालिद्वारा सञ्चालित नागरिक दैनिकमा कार्यरत पत्रकारहरु धर्नामा बसेका छन् ।
श्रमजीवी पत्रकार ऐनअनुसारको तलब पाउनुपर्ने माग गर्दै जिल्ला संवाददाताहरुले काठमाडौ सुन्धारास्थित केन्द्रीय कार्यालयमा बुधबारदेखि धर्ना सुरु गरेका हुन् ।
चार बुँदे माग राखेर धर्ना सुरु गरिएको नागरिक दैनिकका पाँचथर संवाददाता गिरिराज बाँस्कोटाले जानकारी दिए ।
धर्नामा नेपाल पत्रकार महासंघका कार्यवाहक अध्यक्ष रमेश विष्ट, महासचिव रोशन पुरी, पूर्वकेन्द्रीय सचिव रामप्रसाद दाहाल, नेपाल प्रेस युनियनका महासचिव अजयबाबु शिवाकोटीलगायतले ऐक्यवद्धता जनाएका छन् ।
उनीहरुले हालसम्मको सम्पूर्ण पारिश्रमिक तत्काल पाउनुपर्ने, कोरोना महामारीको बाहानामा पत्रकारलाई दुःख दिन नहुने, छ महिना परीक्षणकाल पूरा गरेका सबै स्ट्रीञ्जर जिल्ला समाचारदातासहित सबै पत्रकारहरुलाई स्थायी नियुक्ति र प्रचलित श्रमजीवी पत्रकार ऐनबमोजिमको सेवा सुविधा दिनुपर्ने माग गरेका छन् ।
