काठमाडौं- जनता समाजवादी पार्टी, नेपाल (जसपा) ले सरकारमा पठाउने मन्त्रीबारे निर्णय लिन तीन नेतालाई प्रस्ताव गरेको छ ।
बुधबार बसेको केन्द्रीय कार्यकारिणी समितिको बैठकमा अधिकांश सदस्यले मन्त्रीको नाम टुंग्याउने जिम्मेवारी संघीय परिषद् अध्यक्ष डा.बाबुराम भट्टराई, संघीय अध्यक्ष उपेन्द्र यादव र वरिष्ठ नेता अशोक राईलाई दिने प्रस्ताव गरेका हुन् ।
सरकारमा जानेको नाम टुंग्याउने जिम्मेवारी तीन नेतालाई दिने विषयमा बैठकमा छलफल भएको कार्यकारिणी सदस्य नवराज सुवेदीले जानकारी दिए ।
सुवेदीले भने, ‘मन्त्रीमा कसलाई पठाउने भन्नेबारे निर्णय लिने अधिकार तीन नेतालाई दिनेबारे बैठकमा छलफल भएको छ । यसबारे आजको बैठकमा निर्णय भएको छैन । भोलिको बैठकले यसलाई औपचारिकता दिन्छ ।’
तीन नेताबाहेक अन्य पनि उक्त समितिमा थपिन सक्ने कार्यकारिणी सदस्य गंगा श्रेष्ठले बताए । ‘बैठकले तीन नेताको नाम प्रस्ताव गरेको छ’, उनले भने, ‘अन्य नेताहरु पनि थपिन सक्नुहुन्छ ।’
बैठक भोलि पुनः११ बजे बस्नेछ ।
