भूमिगत राजनीतिबाट खुला राजनीतिमा आएको नेपाल कम्युनिस्ट पार्टी (नेकपा)का महासचिव नेत्रविक्रम चन्द ‘विप्लव’ले अबको तीन वर्षभित्र पार्टीलाई चन्दामुक्त बनाउन निर्देशन दिएका छन् ।
आफ्ना नेता तथा कार्यकर्तालाई उनले श्रम गरेर खान र चन्दा नउठाउन निर्देशन दिएका हुन् । उनी आफैं पनि श्रमसँगै राजनीति गर्ने भन्दै काठमाडौँको वरिपरी भाडामा जग्गा खोजिरहेका छन् ।
अहिलेसम्म नेकपाको मुख्य आर्थिक स्रोत चन्दा नै हो । चन्दा उठाएर पार्टी चलाउँदा पार्टीको उठाएको मुद्दा कमजोर हुने विप्लवको बुझाइ छ ।
पार्टीमा लागेका प्रत्येक कार्यकर्ताले श्रम गर्नुपर्ने र त्यही श्रमबाट निश्चित रकम पार्टीलाई लेबी तिर्नुपर्ने भन्दै विधान संशोधन गर्ने तयारीसमेत नेकपामा भइरहेको छ ।
‘व्यापारी र व्यवसायीहरूसँग चन्दा उठाउँदा पार्टीको मुद्दा कमजोर हुने मात्र होइन, पार्टीमा अपारदर्शितासमेत मौलाएको महासचिवले ब्रिफिङ गर्नुभएको छ,’ नेकपाका एक केन्द्रीय सदस्यले सूत्रन्यूजसँग भने, ‘त्यसैले अब सबै पार्टी पंक्ति श्रममा होमिन्छ । श्रमसँगै राजनीति गर्ने महासचिवको निर्देशन छ ।’
