मंगलवार लगभग सबै सञ्चारमाध्यमहरूले प्रधानमन्त्री शेरबहादुर देउवाले कुलमान घिसिङलाई नेपाल विद्युत प्राधिकरणको कार्यकारी निर्देशकमा नियुक्ति गर्न ठाडो आदेश दिएको समाचार प्रकाशित भए । प्रधानमन्त्रीको सचिवालयबाट आएको यो सूचनालाई धेरैले प्राथमिकताका साथ समाचार बनाएका थिए ।
गत साल भदौ २९ गते आफ्नो ४ वर्षे कार्यकाल सकाएर प्राधिकरणबाट विदा भएका कुलमानलाई पुनः प्राधिकरणमै नियुक्ति गर्नुपर्छ भन्दै सडक प्रदर्शन पनि भएका थिए । देशभरिबाट लोडसेडिङ हटाउन प्रमुख भूमिका खेलेका कुलमानलाई हटाएर निमित्त कार्यकारी निर्देशकका रूपमा तत्कालीन केपी ओली सरकारले लेखनाथ कोइरालालाई नियुक्त गरेको थियो ।
आफ्नो कार्यकाल सकिएर स-सम्मान प्राधिकरणबाट विदा भएका कुलमान एक वर्षपछि पुनः चर्चामा आएका छन् । हालका कार्यकारी निर्देशक हितेन्द्रदेव शाक्यलाई राजीनामा दिन दबाब दिइएको समाचार एकातिर छ भने अर्कोतिर पुनः कुलमानलाई नै ल्याउने सरकारी स्रोतले दाबी गरेको छ ।
यसबारेमा सोध्दा कुलमानले आफूलाई केही थाहा नभएको प्रतिक्रिया दिए । सञ्चारमाध्यमहरूले त तपाईलाई नियुक्ति दिइसके नि ! भन्ने सूत्रन्यूजको प्रश्नमा कुलमानले भने – ‘मलाई केही थाहा छैन ।’ कुलमान आफ्नो चार वर्षे कार्यकाल सकेर प्राधिकरणबाट बाहिरिएका हुन् भने त्यसपछि कार्यकारी प्रमुख भएका शाक्य ४ वर्षका लागि नियुक्त भएका हुन् ।
ऊर्जा मन्त्रालय स्रोत भन्छ, ‘मन्त्रीज्यू (पम्फा भुसाल) र हितेन्द्रदेव शाक्यको कुराकानी मन्त्रालयमै भएको हो । सरकारले खटाए तपाईं अन्त जानुहुन्छ भनेर मन्त्रीज्यूले सोध्नुभएको थियो । शाक्यले सरकारले जे काम अह्राउँछ, त्यही गर्छु भन्नुभएको रहेछ । त्यसैलाई लिएर शाक्यको राजीनामा मागियो भन्ने चर्चा चलेको हो ।’
यद्यपि कुलमानलाई प्राधिकरणमै ल्याउने चाहना देउवाले राखेका छन् । सामाजिक सञ्जालमा कुलमानलाई ‘उज्यालोको प्रतीक’ पनि भन्ने गरेको पाइन्छ । अहिले अघोषित लोडसेडिङ भइरहेको र प्राधिकरण घाटामा चर्चा चलिरहेका बेला कुलमानलाई प्राधिकरणमा ल्याउँदा सरकारले आफूलाई राजनीतिक फाइदा हुने ठानेको देखिन्छ ।
सरकारले शाक्यलाई अन्त कतै पठाउने, जान नमाने स्पष्टिकरण सोध्नेसम्मको तयारी गरिरहेको छ । यसअघि पुष्पकमल दाहाल ‘प्रचण्ड’ प्रधानमन्त्री हुँदा तत्कालीन कार्यकारी निर्देशक मुकेश काफ्लेलाई सरकारले स्पष्टिकरण सोधेर हटाएको थियो ।
त्यतिबेला चिलिमे जलविद्युत कम्पनीबाट प्राधिकरणको केन्द्रीय कार्यालयमा तानिएर जिम्मेवारीविहीन बनाइएका कुलमान घिसिङलाई शर्माले नेपाल विद्युत प्राधिकरण शर्माले प्राधिकरणमा ल्याएका थिए ।
