नेकपा एमालेको माधव कुमार नेपाल समूहको केन्द्रीय कमिटी बैठकमा ७० जना मात्र उपस्थित भएका छन् ।
नेपाल र झलनाथ खनाल समूहमा यसअघि ८८ केन्द्रीय सदस्य रहेको दाबी गरिएको भएपनि बिहीवार बुद्धनगरस्थित क्वालिटी बैंकटमा बसेको बैठकमा जम्मा ७० जना उपस्थित भएका हुन् ।
बैठकमा स्थायी कमिटी सदस्यद्वय योगेश भट्टराई र सुरेन्द्र पाण्डे पनि उपस्थित भएका छैनन् ।
बैठकमा सहभागी एक नेताले भने – ‘योगेश र सुरेन्द्र कन्ट्याक्ट ट्रेसिङमा परेका कारण नआउनुभएको हो भने अन्य कतिपय सदस्यहरू काठमाडौँबाहिर भएकाले उपस्थित हुन नसक्नुभएको हो ।’
पछिल्लो समयमा नेपाल समूहमै विवाद देखिएको छ । जसरी पनि अध्यक्ष केपी शर्मा ओलीसँग मिल्नै पर्ने दबाब नेता नेपालमाथि बढेको छ ।
निर्वाचन आयोगमा अद्यावधिक भएको पछिल्लो अभिलेखमा एमालेमा २०३ जना केन्द्रीय सदस्य रहेको उल्लेख छ । तीमध्ये केहीको निधन भएको छ भने केही कुनै नियुक्तिका कारण पार्टी छाडेका छन् ।
