बुद्धनगरस्थित क्वालिटी बैंकटमा बसेको नेकपा एमालेको माधवकुमार नेपाल समूहको केन्द्रीय कमिटी बैठकले सरकारमा पनि नजाने र नयाँ पार्टी पनि नखोल्ने निष्कर्ष निकालेको छ ।
शुक्रवार बसेको बैठकपछि सञ्चारकर्मीहरूसँग नेता सोमप्रसाद पाण्डेले भने – ‘पार्टी विभाजनको तयारी पनि छैन, र नयाँ पार्टी खोल्ने अवस्था पनि छैन । अहिले हामी एकताकै पक्षमा जोडबल गरिरहेका छौं । कानूनी समस्याका कारण हामी सरकारमा जाने स्थिति पनि बनेको छैन ।’
बिहीवार र शुक्रवार गरी दुई दिन लगातार बसेको केन्द्रीय कमिटीको बैठकमा ५५ जना केन्द्रीय सदस्यहरूले आफ्नो धारणा राखेका थिए ।
सबै केन्द्रीय सदस्यहरूले पार्टीमा सम्मानजनक एकता हुनुपर्नेमा जोड दिएका थिए ।
केन्द्रीय सदस्यहरूले बोल्ने क्रम सकिएपछि बैठक केही समयका लागि स्थगित गरिएको छ भने स्थायी कमिटी बैठक शुरू भएको छ ।
स्थायी कमिटीका सदस्यहरूले केन्द्रीय कमिटीमा आएका कुराहरूको जवाफ कसरी दिने भन्ने तय गर्नेछ ।