काठमाडौँ । नेकपा एमालेको आज बस्ने भनिएको केन्द्रीय कमिटी बैठक भोली सोमबारका लागि सारिएको छ ।
एमाले केन्द्रीय कार्यालयका सचिव शेरबहादुर तामाङका अनुसार बैठक सोमबार दिउँसो ३ बजे ललितपुरको च्यासलस्थित तुलसीलाल स्मृति प्रतिष्ठानको भवनमा बस्नेछ ।
बिहीबार र शुक्रबार बसेको माधव समूहको बैठकले आज बस्ने भनिएको केन्द्रीय कमिटीको बैठक रोक्न चेतावनी दिएको थियो । पार्टीलाई एकताबद्ध बनाउने हो भने आजको बैठक रोक्नुपर्ने माधव पक्षको भनाई थियो ।
माधव नेपाल पक्षको मागबमोजिम नै केन्द्रीय कमिटीको बैठक रोकिएको बताइएको छ ।
एमालेमा लामो समयदेखि अध्यक्ष केपी शर्मा ओली र वरिष्ठ नेता माधव नेपाल पक्षबीच विभिन्न विषयमा कुरा मिलेको छैन ।
पार्टी एकताका लागि पहल भइरहेको दुबै पक्षका नेताहरू बताउँछन् । तर दुबै पक्षका स्थायी र केन्द्रीय कमिटी बैठक भिन्नाभिन्नै रूपमा भइरहेका छन् ।
