नवलपरासी- मोटरसाइकलको ठक्करबाट प्रहरी निरीक्षकको मृत्यु भएको छ ।
सोमबार राति नवलपरासीको बर्दघाटमा मोटरसाइकलले ठक्कर दिएपछि प्रहरी निरीक्षक कपिल वाग्ले गम्भीर घाइते भएका थिए । उनको उपचारका क्रममा मृत्यु भएको जिल्ला प्रहरी कार्यालय पश्चिम नवलपरासीले जनाएको छ ।
पैदल हिँडिरहेका इन्स्पेक्टर वाग्लेलाई सोमबार बेलुकी ९ बजे लु १४ प ८७५८ नम्बरको मोटरसाइकलले ठक्कर दिएको थियो । गम्भीर घाइते भएका उनलाई तत्कालै भैरहवा मेडिकल कलेज लगिएको थियो ।
उनको उपचारका क्रममा गएराति ११ बजे मृत्यु भएको प्रहरीले जनाएको छ । काठमाडौँको बसुन्धाराका बासिन्दा इन्स्पेक्टर वाग्ले इलाका प्रहरी कार्यालय बर्दघाटमा कार्यरत थिए ।
उनलाई ठक्कर दिने मोटरसाइकल चालक सुनवल नगरपालिका-१ का दीपेन्द्र पुन मगर पनि गम्भीर घाइते भएका छन् । उनको उपचार भइरहेको प्रहरीले जनाएको छ । सांकेतिक तस्बिर ।
