काठमाडौं- नेकपा एमालेका उपाध्यक्ष भीम रावलले हिजोका दिनमा अध्यादेश जारी गर्दा चर्को विरोध गर्नेहरू आज आफैं त्यही बाटोमा हिँडेको भन्दै कटाक्ष गरेका छन् ।
प्रधानमन्त्री शेरबहादुर देउवा नेतृ्त्वको सरकारले एमालेका वरिष्ठ नेता माधव नेपाललाई दल फुटाउन सहज हुनेगरी अध्यादेश ल्याएको दिन मंगलबार राति सामाजिक सञ्जालमार्फत नेता रावलले विरोध जनाएका हुन् ।
उनले भने, ‘विगतमा यस्तै अध्यादेशलाई अलोकतान्त्रिक भन्दै चर्को विरोध गर्नेहरू आज त्यही बाटोमा किन ? २०५४ सालमा एमाले फुटाउदा देशमा द्वन्द्व चर्किएको हेक्का नरहेको किन ?’
दल विभाजनसम्बन्धी अध्यादेश संविधानको मर्म र जनताको आकांक्षा विपरीत निहित स्वार्थको लागि देशलाई अस्थिर तुल्याउने खेल हो।विगतमा यस्तै अध्यादेशलाई अलोकतान्त्रिक भन्दै चर्को विरोध गर्नेहरू आज त्यही बाटोमा किन? २०५४ सालमा एमाले फुटाउदा देशमा द्वन्द्व चर्किएको हेक्का नरहेको किन?
— Dr. Bhim Rawal (@BhimRawal179) August 17, 2021
दल विभाजनसम्बन्धी अध्यादेश संविधानको मर्म र जनताको आकांक्षाविपरीत निहित स्वार्थको लागि देशलाई अस्थिर तुल्याउने खेल भएको नेता रावलले टिप्पणी गरेका छन् ।
मंगलबार प्रधानमन्त्री देउवाले दल विभाजन सम्बन्धी अध्यादेश राष्ट्रपति विद्यादेवी भण्डारीसमक्ष सिफारिस गरेका छन् ।
अध्यादेशका विषयमा राष्ट्रपति भण्डारीले विज्ञहरूसँग परामर्श गरिरहेको राष्ट्रपति कार्यालय स्रोतले जनाएको छ ।
