काठमाडौं- नेकपा एमालेका केन्द्रीय सदस्य सूर्य थापाले प्रदीप नेपालपछि थप ५ नेताले माधव नेपालले गठन गरेको नयाँ दल नेकपा एमाले (समाजवादी) पार्टीको केन्द्रीय सदस्यमा बस्न अस्वीकार गरेको दाबी गरेका छन् ।
नेता थापाले कृष्ण खनाल (चितवन) सुरेश कार्की (उदयपुर) नरेश खरेल (झापा) र शिवकुमार गुरुङ (ताप्लेजुङ) ले माधवकुमार नेपालको विभाजनका विपक्षमा उभिने घोषणा गरेको दाबी गरेका हुन् ।
साथै नेता थापाले वरिष्ठ नेता झलनाथ खनाललगायतका नेताले पनि क्रमशः माधव नेपालको पार्टी अस्वीकार गर्दै जाने आशासमेत व्यक्त गरेका छन् ।
‘कमरेडहरू झलनाथ खनाल, प्रदीप नेपाल, सुरेन्द्र मानन्धर, वसन्त मानन्धर, कृष्ण खनालसहित धेरै नेताको नाम यहाँबाट हट्दै जाने छ,’ थापाले सामाजिक सञ्जालमार्फत भनेका छन्, ‘प्रतीक्षा गरौं र अरू इमान्दार व्यक्तिले पनि कमरेड प्रदीपले झैं घोषणा गर्नेछन् । आशा पनि गरौं ।’
